2015: Taon ng mga Dukha


Opisyal na idineklara ng Catholic Bishops Conference of the Philippines (CBCP) ang taong 2015 bilang Taon ng mga Dukha. Ang temang ito ay hango sa ebanghelyo ni San Lucas. Ang taon ng mga mahihirap ay ang ikatlo sa siyam na taon sa panahon ng Makabagong Ebanghelisasyon.

Sa pagdiriwang ng taon na ito, itinalaga ng CBCP ang National Secretariat for Social Action (NASSA) na manguna sa selebrasyong ito, sa pamamagitan na rin ng pakikipagtulungan sa iba’t-ibang komisyon ng CBCP at ng mahigit 85 diyosesis sa Pilipinas.

Sa pahayag mula kay Father Edwin Gariguez, Executive Secretary ng CBCP-NASSA,   ang simbahan diumano ay patuloy ang pagtatanggol para sa mga mahihirap at sa mga naaapi lalung-lalo na sa mga sitwasyon kung saan ay wala pa ring tigil ang paglabag sa karapatang pantao at ang hustisya ay hindi maramdaman ng mga magsasaka, mga katutubo, mangingisda, manggagawa at maging sa mga biktima ng  kalamidad. Ayon sa kanya ang selebrasyon na ito ay isang panawagan ng pagpapanibago at pagpapasimula sa ating mga pangako para sa pagtulong at pagmamalasakit sa kapwa.

Sinimulan ang deklarasyon na ito sa pamamagitan ng Banal na misa sa pangunguna nina Arsobispo Rolando Tria-Tirona, Episcopal Commission on Socaial Action, Justice and Peace (ECSA-JP) Chair at Obispo Juan De Dios Pueblos ng Diyosesis ng Butuan kasama ang kaparian ng Butuan at mahigit 200 taong nakilahok dito.

 Napoles: Tell All Tale


Mahigit siyam na buwan na ang lumipas nang unang bumulaga sa atin ang usapin tungkol sa malabuwayang pangangamkam ng iilang tao sa kaban ng bayan. Pondo na kilala sa Tawag na Priority Development Assistance Fund o PDAF.

Sa The Forum ng Catholic Media Network nitong Abril 29, 2014 na ginanap sa Ilustrado, Intramuros muling pinag-usapan ang hindi dapat kalimutan na isyung ito kasama sina Kongresman Lito Atienza na kilala sa kanyang pagkontra sa pagkakaroon ng Pork Barrel Fund at Abp. Oscar Cruz na kilala rin sa kanyang mga akusada laban sa katiwalian ng ating lipunan.

Ayon kay Kongresman Lito Atienza ang pagpapatawag kay Napoles sa Senate Investigation at pagsasalaysay sa harap ng maraming Pilipino nang sinasabing “Tell all Tale” ay diumano magbubunga lamang ng isa na namang kamalian.

Aniya, “Akoy naniniwala na hindi na magbubunga ng tama yun. Ang dapat gawin ay ang kanyang (Napoles) ibinigay na Affidavit sa DOJ, ilathala niya sa dyaryo at ang Ombudsman naman kasuhan lahat kung sino man yang mga yan.”

Dagdag pa niya, “Yung number one suspect kumanta na. Ano pang hinihintay natin? Mag-iimbestiga pa? Anong iimbestigahan? Kasuhan na ang dapat kasuhan at sa korte na sila magkita-kita.”

Sa kabilang dako ukol naman sa mga pinanghahawakang listahan umano ng mga sangkot sa isyung ito ayon kay Abp. Oscar Cruz.

“Yung listahan na pinanghahawakan ni former Senator Lacson, ito po sa akin ay mahalaga. Sapagkat iyang si Sen. Lacson ay kilalang-kilala ko sa simulat’simula, hindi po yan naloloko at nagpapaloko.”

Simula nang mapasa-kamay ni Sec. Delima ang umanoy listahan ng mga sangkot sa isyung ito mula sa tinatawag na “Queen of Pork” hanggang sa kasalukuyan ay hindi pa rin ito nailalathala at naisasapubliko.

“Naunawaan ko na si Sec. De Lima ay kini-clear out pa sa Pangulo kung ilalabas nya yung listahan na galing kay Napoles, kung sinu-sino ang dapat ilabas o hindi.”- Abp. Oscar Cruz

“This (Pork Barrel Scam) is the biggest scandal that is already affected the roots of our democracy. Biggest! Wala pa akong nabalitaang ganitong eskandalo na buong Senado halos kasali , Kongreso kasali, Executive Department kasali.” Wika ni Kongresman Atienza.

Dagdag pa nito, “Ang number one issue kung bakit hindi tayo umuunalad ay dahil sa Corruption.”

Maliit man o malaking uri ng pandaraya sa lipunan, sa anumang paraan ay mananatiling pandaraya at panlalamang. Lahat ng pagkakamali ay may karampatang parusang nakaabang sa sinumang makagagawa nito.

Nawa ang kaayusan at pagkakapantay-pantay ay magsimula sa mga namumuno ng bayan. Hindi puro sarili ang iniisip at ang pagpapayaman dito sa mundong ibabaw. Sapagakat pagdating ng araw na ang bawat isa ay haharap sa Diyos na may lalang, tayo ay huhusgahan hindi sa kung gaaano kalaking yaman ang iyong naimpok ngunit kung paano at ano ang mabuting buhay ang iyong naibahagi sa iba.

Ang mabuhay na may dangal ay kinalulugdan ng Maykapal.

FIESTA NAZARENO 2014


Tema: “Debotong Layko ng Poong Hesus Nazareno, Tapat na Katiwalang Nagdarasal, Sumusunod at Sumasaksi

Sa pagdiriwang ng Piyesta ng Nazareno ngayong ika-siyam ng Enero, nakahanda na ang lahat ng institusyong katulong upang mas mapaganda, maging mapayapa at mapaayos ang gagawing Traslacion o Prusisyon ng Imahe ng Poong Nazareno. Kabilang sa mga institusyong ito ay ang Dept. of Health (DOH), Metro Manila Development Authority (MMDA), Philippine National Police (PNP), National Disaster Risk Reduction ang Management Council (NDRRMC) at ang Dept. of Public Works and Highways (DPWH). Nakatakda na rin ang kaniya-kaniyang gawain base sa kanilang napagpulungan.

Ayon  kay Msgr. Jose Clemente F. Ignacio, Rector at Parish Priest ng Quiapo Church, kaiba sa daang tinahak noong nakaraang taon,  may kaunting pagbabagong mangyayari sa Routang daraanan ng prusisyon.

Aniya, Alam na po natin ang  problema ng McArthur Bridge at dahil po dito ay nagpasya po kami na papakiusapan po natin ang mga deboto at mamamasan para na rin sa kaligtasan ng lahat at ang Routa po ng ating darating na prusisyon ay daraan po sa Jones Bridge at kakanan po sa Escolta at babalik  paikot doon sa FEATI at tuloy-tuloy na rin po doon sa Villalobos.

Dagdag pa ng Monsignor, ang eskedyul ng Traslacion ay walang ipinagkaiba sa nakaraang taon.

Ang mga schedule po natin ay pareho pa rin , magsisimula po ang ating darating na replica prusisyon sa darating na January 7.-Msgr. Clemente Ignacio

At upang mas mapalalim ang pagninilay sa Tema ngayong taong ito, ayon pa sa kanya, magsasagawa din  sila ng Vigil para sa pagdiriwang na ito.

May overnight vigil po tayo na inihanda ng kabataan ng Quiapo at kabataan ng Batangas at dito po ay palalalimin po yung tema ng ating Traslacion. -Msgr. Clemente Ignacio

Samantala, ayon naman kay Fr. Ricardo Valencia, Assistant Parish Priest ng Quiapo Church, ang mga debotong dumalo sa Pagdiriwang na ito sa nakaraang taong 2013 ay nasa mahigit 9.6 milyong katao at kung pagbabasehan diumano ang trending, ito ay umaakyat kada taon ng 15-20 percent. Kung kaya naman inaasahan na ang higit pang pagdagsa ng mga debotong makikilahok sa taong ito.

Ang pagdiriwang na ito ay ang unang hakbang lamang para sa mga taong lubos na nananalig sa Diyos, buong pusong nananampalataya at umaasa sa biyaya ng Poong Maykapal. Ito rin ang  pasimula ng pagdiriwang sa pagdedeklara para sa taon ng mga Laykong Pilipino.

%d bloggers like this: